Նկարագրություն
Մասյացոտնի թեմի Վեդիի Սուրբ Աստվածածին եկեղեցին կառուցվել է 2001 թվականին հին, կիսաքանդ մի մատուռի տեղում և օծվել է Արարատյան Հայրապետական թեմի առաջնորդական փոխանորդ Տ. Նավասարդ արք. Կճոյանի կողմից: Եկեղեցու կառուցման բարերարներն են Էդգար և Կոլյա Շաբոյանները։
Եկեղեցու բակում կա չորս խաչքար, մեկը՝ 7-րդ դարի, մեկն էլ նվիրված է Արցախյան բոլոր պատերազմներում նահատակված հերոսների հիշատակին։
Եկեղեցական համայնքի վարչական շրջանն ընդգրկում է Վեդի խոշորացված համայնքը։ Կառուցման ընթացքի մեջ են Նոր Կյանք և Ոսկետափ բնակավայրերի եկեղեցիները։
Եկեղեցական համայնքում գործում են Տիկնանց եւ երիտասարդաց միությունները եւ կիրակնօրյա դպրոցը։ Յուրաքանչյուր կիրակի օր եկեղեցում անցկացվում են Սուրբ Գրքի սերտողություն, ինչպես նաև կիրակնօրյա դպրոցի սաների դասընթացներ։ Ամեն կիրակի և եկեղեցական կարևոր տոներին մատուցվում է Սուրբ Պատարագ։